Ruk Jana Nahi (रुक जाना नही...)

ही जीवन गाथा आहे भावेश भाटिया यांची.
राष्ट्रपती पुरस्काराने तीन वेळा सन्मानित करण्यात आलेले भावेश भाटिया ‘सनराईज कॅन्डल्स’ या उद्योगाचे संस्थापक आहेत. पूर्णत: दृष्टिहीन असूनही त्यांनी निश्चय व मेहनतीच्या बळावर महाबळेश्वरमध्ये एका हातगाडीवर सुरू केलेला मेणबत्त्यांचा व्यवसाय आज ‘सनराईज कॅन्डल्स’च्या माध्यमातून देशविदेशांत पसरला आहे. आज या उद्योगाची कोटींत उलाढाल आहे. आपल्याबरोबरच आपल्या इतर दृष्टिबाधित मित्रांनाही रोजगार मिळावा यासाठी त्यांची कंपनी प्रयत्नशील असते. आज त्यांच्यासोबत हजारो दृष्टिबाधित बंधूभगिनी त्यांच्या खांद्याला खांदा लावून काम करत आहेत.
अत्यंत खडतर परिस्थितीवर मात करत शिखरावर पोहोचलेल्या एका शूर योद्ध्याची ही कहाणी आहे. श्री. भाटिया यांना ‘रेटिना मस्क्युलर डिजनरेशन’ नामक आजारामुळे बालपणीच दृष्टी गमवावी लागली... त्यांच्या आईला कर्करोग झाला होता. त्या आजाराशी झुंज देताना अखेर त्यांनीही जगाचा निरोप घेतला... पण, ‘‘तू जग पाहू शकतोस की नाही या गोष्टीने काहीही फरक पडत नाही, पण तू आयुष्यात असं काहीतरी करण्याचा अवश्य प्रयत्न कर, ज्यायोगे हे जगच तुझ्याकडे पाहू लागेल,’’ या आईच्या शिकवणीचं संचित त्यांच्यापाशी होतं. मग त्याच्या बळावर त्यांनी पत्नी नीतासोबत स्वत:चं विश्व असं निर्माण केलं, जे समाजातील सर्वच घटकांसाठी प्रेरणादायी आहे.